مستشفي«الكهرباء»بألماظه تسطر ملحمة إنسانية فى إنقاذ حياة سيدة من خارج القطاع
شهد موقع التواصل الاجتماعي "فيس بوك" خلال الساعات الماضية تفاعل كبير من قبل المتابعين والمستخدمين للموقع بعد قيام سبدة بكتابة منشور تضمن إشادتها البالغة بمستشفي الكهرباء والأطقم الطبية والتمريض داخل المستشفي عند تعرضها لحالة إعياء شديدة اثناء تواجدها بمول سيتي سنتر القريب من مستشفي الكهرباء بألماظه ٠٠٠
الواقعة التي كتبتها سيدة تدعي راندا البحيرى عبر صفحتها علي موقع التواصل الاجتماعي "فيس بوك" جاءت كالتالي ؛-
تجربة لاتنسى في طوارئ مستشفى تابعة لجهة حكومية بالأمس
وأنا في مول ألماظة جالي مغص كلوي مفاجئ واللي جربه يعرف قد إيه الألم ده غدار جدا بيوصل لدرجة لا تحتمل في ثواني معدودة جريت على صيدلية المول على أمل أخد مسكن قوي الدكتور قالي لازم تروحي مستشفى فورا لأن حقيقي كنت فقدت السيطرة من شدته خرجت من أقرب بوابه ربنا رزقني بسواق تاكسي تبع المول شهم وأبن أصول قلتله وديني بسرعة السعودي الألماني اتحركنا وأنا خلاص بصرخ من شدة الألم
لما شافني بالحالة دي قالي السعودي الألماني هتبقى بعيدة عليك هوديكي مستشفى قريبة هنا اسمها مستشفى الكهرباء مش هناخد ٣ دقايق في الطريق فعلا وصلني بسرعة البرق ورفض رفض تام حتى ياخد مني فلوس ورغم خوفي من الفكرة السائدة عن المستشفيات الحكومية بمجرد دخولي اتفاجئت بمعاملة إنسانية فوق الوصف جالي ممرض شاب في دقيقة حطلي كانيولا بشطارة وخفة وحرفية عالية وبدأ يحقنلي مسكنات وممرضة تانية بتقيس لي الضغط وبعدها جريت جابتلي ميه وعصير على حسابها ورفضت تاخد مني جنيه بعزة نفس وإنسانية ابهرتني والله ودكتور محترم بعد ما الألم بدأ يهدى جالي ووقف يسمعني ويفهمني أعمل ايه بعد ما أخرج من المستشفى وكل خمس دقايق ألاقي الممرض جي يطمن عليا ويشوف الألم وصل لفين
ساعة ونص من العذاب اتحولت لشعور بالامتنان والراحة وخرجت بخير الحمد لله التجربة دي أكدتلي إن في بلدنا لسه في ناس بضمير وإنسانية أكبر من أي إمكانيات ومستشفيات حكومية قادرة تنافس أكبر مستشفيات خاصة بالمهنية والمعاملة الطيبة ولو أتوفرت لهم أمكانيات أعلى مش هيبقى في حد في العالم زيهم والله
شكرا جزيلا من قلبي للسواق الجدع أبن الأصول أللي وصلني ورفض احاسبه وشكرا لكل ستاف الطورائ في مستشفى الكهرباء اللي كان موجود الساعة ٩ مساء معرفش أسم ولا واحد فيكم بس والله ما هنسى ضميركم وأخلاقكم وأنسانيتكم وأللي عملتوه معايا❤️
